Humbani ayat 1-8 ipatugah siparpsalmen do sonaha pe hebatni naibata na legan na itompa tanganni jolma humbani omas atap pirak, boi taridah tapi lang boi marguna tarlobih laho mangurupi sidea.  Ihatahon si parpsalmen do ai tangkas humbani ayat 5-7: dong matani tapi seng marpangidah, dong do pinggolni tapi seng marpanagar, dong iggungni tapi seng marpangangoh, dong do tanganni tapi seng boi manjamah, dong do naheini tapi seng boi mardalan, seng luar sora humbani tolonanni. Artini lang adong gunani sasahalak martenger ni uhur hubani halani lang naibata na manggoluh anggo naibata ni sidea in, lang boi mangurupi ampa paluahkon sidea humbani ganup pergumulan. Ase ihatahonni do: sai songon sidea ma halak na paulihonsi, sagala halak na martenger ni uhur hujai (ay.8). Tapi anggo Naibatani Israel, Naibata na markuasa i nagori atas pakon dunia on do Ia (ay.3) ase talup ma ganup jolma na manggoluh mamuji TUHAN in. Hal on do na ipatorang psalmen bani perikop on. 

Hatoranganni 

Adong do 3 alamat na iarahkon parpsalmen ase porsaya ampa mamuji Tuhan: 

Naparlobei; iarahkon bani Israel ase porsaya dompak Jahowa. Podah on tontu pasingatkon ase selaku bangsa pilihan na domma mengalami kuasa ni Naibata sepanjang sejarah ni goluhni sidea ulang be ragu ampa sangsi, tapi setia ma dompak Naibata Israel na domma anjaha tongtong mangurupi ampa gabe gatar dompak sidea. 

Napaduahon; iarahkon bani ginoprni si Aron ase porsaya bani Jahowa. Hal on penting halani sebagai ginoparni malim anjaha gabe malim maningon ma sidea mengimani anjaha porsaya dompak Naibata. Sidea do holi homa na maningon pasingatkon, mengajarhon ampa meneladankon pasal Naibata dompak bangsa in ase boi totap setia ibagas marhaporsayaon dompak Naibata. 

Napatoluhon; arahanni itujuhon dompak halak na mangkabiari Jahowa. Kelompok on itujuhon bani sidea non Jahudi sonai age non malim ase totap ma porsaya anjaha menghormati Naibata Israel. Naibata na domma ihabiari sidea sadokah on domma topat, ase totap ma setia ibagas na marhaporsayaon dompak Tuhan. Sidea pe boi gabe contoh anjaha motivasi dompak halak na legan pasal haporsayaonni dompak Naibata. 

Parpsalmen lang pitah mangarahkon 3 kelompok on ase porsaya dompak Tuhan, tapi dihut do homa menekankan pasal pambahenanni Naibata dompak sidea: 

1) Idingat anjaha ipasu-pasu Tuhan in do hita

Tontu tubuh do perasaan senang ampa terhibur anggo idingat Tuhan in do hita. Tuhan na totap mardingat bani dirinta ai sirsir homa mamasu-masu. Hal on tontu pataridahkon homa banggal ni holongni Tuhan in banta na lang ra manlupahon jolma na tinompani anjaha sirsir homa mamasu-masu. Tontu hal on gabe patambah haporsayaon tarlobih sanggah itongah-tongah pergumulan. Pardingat anjaha pasu-pasuni Tuhan in sukkup do mambahen hita porsaya paboa hasombuhon lang boi mambahen hita gabe gayuron, naborit lang pamateihon, kerja keras lang mambahen loja amoa soya, pusokni uhur lang mamboiskon, hagoluhan on lang manangkut, hameteian ai pe lang gabe pamateihon, janah neraka pe lang mangurung. Sebalikni, padan na sirsir mambere ampa mamasu-masu ginomparni halak na porsaya mambahen halak na marhabiaran hubani Tuhan boi totap tegar halani jaminanni Naibata berkelanjutan do dompak halak na porsaya. 

2) Nagori atas ronsi Tanoh on pakon pujian sadokahni dokahni 

Langit ai ma langitni Naibata, tapi tanoh on domma iberehon bani anak-anakni jolma. Halak na domma matei lang be mamuji Tuhan, tapi na manggoluh mamuji Tuhan ma sonari ronsi sadokahni dokahni. Parpsalmen mangakui otoritasni Naibata sebagai panompa langit pakon tanoh on (ayat 15). Ijon ma iakui kekuasaanni Naibata na torus adong, janah ibere do mandat bani jolma in pasal tanoh on (ay. 16), ase igunahon bahen hadearonni hagoluhan, sebagai pengelola na bijak janah gok ibagas hauhuron, lang mamparbois-bois atap pe parambur-amburhon haganupan ai. Boi pe ikelola jolma in bumi on marhitei idopni uhurni Naibata do. Jolma in aima ahli waris na sah, tapi anggo kepemilikan tong do Naibata. 

Psalmen on iujungi marhiteihon sada kesimpulan na sekaligus sebagai arahan paboa Sedo na dob Matei in Mamuji Jahowa. Lang be tartangar sorani na dob matei bani halak na manggoluh, janah lang be boi sidea marsaksi pasal Naibata atap pasal hagoluhan on pe. 

Hahonaonni

1. Tuhanta Jahowa aima Tuhan na manggoluh na marbeda pakon gana-gana atappe naibata na legan. Ia aima Tuhan na tontong markuasa anjaha marpambahenan laho mangurupi, mamasu-masu ampa paluahkon hita. Ase porsaya ma dompak Ia.
2. Lang adong pembatas laho mangkaporsayai Tuhan. Sebagai bangsa pilihan atap lang, sebagai ginomparni malim atap lang, sebagai pemeluk agama Kristen atap lang, na pasti ise pe jolma anggo marhabiaran dompak Jahowa anjaha marhaporsayaon dompak-Si do ia, sirsir do homa Tuhanta in mardingat anjaha mamasu-masu goluhni. 
3. Tuhanta aima Tuhan na manggoluh, ase hita pe sadokah dong hosahta, sai puji ma Tuhan in. Puji ma Tuhanta in sanggah marhosah hita ase jumpah hita ma hagoluhan na sintong in. Sitaronon atap aha pe ai seng anjai mambahen hita pasohkon puji-pujian ai. Anggo totap do pujian ai, torus ma ai marlanjut ronsi das hu hagoluhan simagira hansipe pujian ai lang tartangar i dunia on. Hasrat pujian ta na tang sibagasan aima harosuhni Tuhan ronsi hamuliaonni goran-Ni.