Janah responni parpsalmen bani pemulihan na binahen ni Naibata bani, ia padaskon doding hatarimakasihon/ucapan syukur. Pemulihan/hamalumon na humbani Jahowa ai mangubah tangisni gabe tortor malas ni uhur.

Hatoranganni

Ayat 1-6: Hasaksian Haporsayaon

Psalmen on ai ma puji-pujian (nyanyian syukur) perseorangan (Daud). Ibagas perkembangan selanjutni, psalmen on idodingkon sanggah iadongkon pamongkoton ni Rumah Panumbahan. Janah humbani tahun 165 sM, bangsa Jahudi mamestahon perayaan pamongkoton Rumah Panumbahan, janah doding on idodingkon (Joh.10:20)

Daud patugahkon pakon mangarahkon haganup halak ase mandoding pakon patimbulhon goran ni Jahowa halani haganup habujuron-Ni. Ai sirsir do Jahowa manangar tonggo pangindoanni janah ijaloni do hamalumon humbani naborit na gabe beban naborat tumang ai bani (ay. 3-4). Daud mangahapkon dirini usih songon halak na ipagoluh use, maluah humbani na manuruk tanoman.

Holong ni Jahowa, mambahen goluhni gabe sahalak terhormat, isegani, seng ipalopas tarbador, halani ia mamparnalomhon Jahowa. Tapi anggo halak pargeduk na so ingkat marhala maningon tarbador (ay 2,4: bnd 25: 3). Tongon lang iharosuhkon Jahowa janah roh do ringis-Ni mangidah goluhta na lang romban bani harosuh-Ni, tapi anggo mintor podas do manolsoli pakon ra paubahkon uhur, mulak do use uhur ni Jahowa. Ai tongkin do panomboh ni ringis-Ni, sadokah manggoluh do idop ni uhur-Ni, bodari sogop partangison, patarni masa paroloboloban (ay.6).

Ayat 7-10: Pargoluhanni Daud

Daud domma manjalohon idop ni uhur ni Jahowa na gok ibagas goluhni. Harta, jabatan, ginompar, pakon kuasa domma ijalo humbani Jahowa. Goluhni mapan, sejahtera pakon bahagia. Tapi pasu-pasu na jinalo ni ai ididahni halani hapatutanni ia sombong. Gabe lang itandaini dirini/lupa diri, mangahap bahasa kuasani seng anjai magou, akan berlangsung selama-lamanya. Bani ayat 7 ihatahon, “Tapi anggo ahu sanggah sonang ongga huhatahon, “Seng anjai targompang ahu.”

Tapi lang ibagas panagaman, sitaronon roh hubani dirini. Par-Psalmen manaron panahit na parah tumang. Sonaima boratni panahit ai, ronsi ia memposisihon dirini songon sahalak na dob matei. Bani ayat 4b isobut, “Domma ipagoluh Ham use ahu, maluah humbani na manuruk tanoman.” Bani panorang ai ma Daud mangahapkon bahasa lang adong artini ganup kuasa, harta pakon jabatanni anggo matei ia, anggo Jahowa manadingkonsi. Halani ai Daud manolsoli kesombonganni, dob ai dilo-dilo mangindo pangurupion humbani Jahowa ase ipaluah.

Bani Psalmen 30 on, anggo ididah secara konteks lang ipatuga secara detail parnaboritan na ongga masa bani Daud. Tapi boi do ididah secara historis, bangsa Israel ongga do iuhum Jahowa halani dousa marhitei na parohkon panahit sampar, sanggah Daud gabe raja ijia. Jadi nini para ahli, bahasa Daud dihut mengalami penyakit ai, halani ia pe homa bagian humbani halak Israel (Bnd. 2 Samuel 24: 1-17)

Ayat 11-13: Idop ni uhur ni Jahowa

Daud sadar pakon mananda ise dirini sasintongni i lobei-lobei ni Jahowa, mambahen ia manosal bani kesombonganni na dob in, gabe ia memposisihon dirini selaku halak na mangindo ase ihaholongi. Ibagas hagalekonni pakon toruh ni uhur, ia mangindo pakon dilo-dilo bani Jahowa. Ia patugahkon bahasa pitah Jahowa do sipangurupi bani. Seng marmegah ia pasal dirini, tapi marondos pitah hubani Jahowa.

Hahonaanni

1. Haganup na dong bnta, Naibata do parsimadasi, na laho ipakeihon hita bahen hadearon pakon haporluan ni goluhta sonai hasoman jolma. Ase porlu do adong refleksi diri, ase ulang tubuh sifat egois pakon kesombongan ibagas goluhta. Bani Jeremia 9: 23-24 ihatahon, “Sonon do hata ni Jahowa: Sai ulang ma ienjengkon halak na pentar hapentaranni, ulang ma iunsagahkon siparkuasa kuasani, anjaha ulang ma ihagijangkon na bayak habayakonni. Tapi barang ise, na sihol tarpuji, marhitei on ma ia pujion, ai ma, na maruhur ai ia anjaha itandai Ahu, paboa Ahu do Jahowa na mandalankon idop ni uhur, hasintongan ampa hapintoran i tanoh on; ai halak sisonai do rosuh ni uhurhu, nini Jahowa.”
2. Manggila no Jahowa mangidah hita na manlembang humbani dalan-Ni, tapi totap do holong uhur-Ni hubani halak na sirsir paubahkon uhurni. Sirsir do ia mangurupi hita ase jumpahan hasonangan hita asal ma ra hita roh huBani (Mat. 11: 28)
3. Jahowa harohan ni hamalumon/kesembuhan! Hamalumon humbani bagei ni panahit. Ase mangarap ma bani Jahowa, ulang mangunsagahkon diri sandiri sonai age na legan.