Sibasaon 13 April 2025 (Palmarum), Johannes 12: 12-15, Topik: Mangakuhon Panrajaion ni Naibata (Mengakui Kekuasaan Allah),  Doding: 246:1+5

Parlobeini

Minggu Palmarum/Palem ai ma peristiwa na monumental bani pardalanan pangindangionni Jesus i dunia on. Peristiwa palem on aima sanggah Jesus ialo-alo sebagai Raja sanggah masuk Ia hu Jerusalem. Ribuan halak mangalo-alo Jesus ibagas malas ni uhur, ipambuati sidea bulung-bulung ni palem, anjaha mandilohon, “Hosianna!” – tapi piga-piga ari dob honsi ai, halak na dos do homa na mandilohon, “parsilangkon Ia.” Fenomena on pataridahkon bahasa sonin ma urahni jolma ibobai euforia sesaat tanpa adong pengakuan iman na sintong.

Sermon Ambilan 13 April 2025 (Palmarum) Psalmen 68: 25 – 36, Topik: Mangakuhon Panrajaion ni Naibata, Doding: 201: 1, 3, 5, 6

Parlobeini

Psalmen 68 ai ma doding pujian na ihubungkon pakon perayaan kemenangan ni Naibata mantaluhon munsuh-munsuh-Ni. Humbani sejarahni, lang boi itontuhon panorang pasti ni namasa ai bani Israel, tapi buei penafsir meyakini bahasa Psalmen on isuratkon bani panorang panrajaion ni si Daud atap raja Salomo i Israel. Bani konteks budayani, psalmen on mencerminkon tradisi pamujion ampa tonggo ibadah Israel kuno. Psalmen on pe mengandung elemen mitologi ampa kosmologi Timur kuno, na pataridahkon Naibata ai Raja na manrajai dunia on/alam semesta, na mamimpin bangsa-Ni bani parporangan janah mamboban hamonagan bani bangsa-Ni. 

Sibasaon: Psalmen 126:1-6, Doding: 386:1-3, Topik: Domma Isasap Dosamu 

Parlobeini

Psalmen 126 on mambobai hita hubani pargoluhan bangsa Israel pasca habuangan Babel. Ase sobuton do homa psalmen on syair reflektif janah igolongkon hubani doding Ziarah (Heb. syir hamma’aloth; the song of ascents/degrees) humbani bindu 120 ronsi 134. Doding on idodingkon dalam rangka menghayati tahapan-tahapan perjalanan fisik ataupun rohani das bani ianan na pansing/Jerusalem. 

Ambilan: Lukas 7: 41-50 Doding: 145 :1,3,4, Topik: Domma Isasap Dosamu

Parlobeini

Adong istilah na mangkatahon “usaha tidak akan mengkhianati hasil”. Humbani ambilan on boi hita marlajar pasal sonaha usaha ibagas na manangar hatani Tuhan, mandalanhon hata ai, gabe hitei laho mananda Jesus Kristus janah marbuahkon hasasapan dousa, pakon haluahon. Adong 3 tokoh bani teksta on aima; Simon, Jesus Kristus, janah sahalak naboru pardousa. Namasa on ipungkah sanggah Jesus salosei mangidangi, lanjar iontang Simon hu rumahni. 

Nats : Johannes 4 : 4 - 14, Topik : Jahowa do Bona ni Bah Hagoluhan, Usul Doding : Haleluya No. 151 : 1-3

Parlobeini

Ambilanta on aima parsahapan ni Jesus pakkon boru Samaria pasal hinaporlu ni bah janah Jesus do bah Hagoluhan. Ase bani Injil Johannes on, Jesus patugahkon bahasa Ia ma sumber bah Hagoluhan. Janah bah hagoluhan na binere ni Jesus ai, aima sumber hagoluhan sisadokah ni dokahni. Porlu tumang do bah banta tene bani pargoluhanta.

Sibasaon: Jesaya 5:1-7, Doding: 496:1+3, Topik Minggu: Marhamubahon ni uhur ase ulang magou

Parlobeini

Bani Jesaya 5, Naibata ai ma simada kobun anggur, janah halak Israel ampa Juda ai ma kobun anggur-Ni. Naibata domma manramotkon sidea na saindokah, hun Masir nari das hu tanoh bagah-bagah. Haganupan domma ibahen Naibata ibagas na dear ampa gok holong hubani sidea. Inahkon do sidea bani ianan na gijang, aima; Jerusalem. 

Bahan Sermon Ambilan, 23 Maret 2025 (Okuli)             

Ambilan: Lukas 13: 1-5                

Doding: 300:1-2

Topik: Marhamubahon ni uhur ase ulang magou

Kegiatan: Panggalangon hu Dana Pensiun Pegawai

Parlobeini

Mangihuthon kalender gerejawi minggu on ai ma minggu Okuli, “Sai mengkawah do matangku dompak Jahowa.” Sai mangkawah patuduhkon dong sada fokus perhatian, aima; Jahowa. Ia do na gabe sentral ganup goluhta atap tindakanta (bnd. Kol. 3:23). 

Pdt. SA Girsang, S.Th, Ambilan Minggu Jubilate, 3 Mei 2020

1 Kronika 16:31-36

Topik Minggu : Marsurak ma bani Tuhan!

1. Teks ambilan on ai ma doding puji-pujian na iluarhon halak Israel bani panorang ni raja Daud, sanggah inahkon poti parpadanan ni  Jahowa hu lampo-lampo na dob pinasirsir ni raja ai (Ayat 1). Poti parpadanan gabe simbol kehadiran ni Naibata do ai i tongah-tongah ni bangsaNi, na dob pinaluahNi hun parjabolonan Masir. Sompat do irampas halak Palistim poti parpadanan in, tapi halani mangkorhon hasunsahan banggal do ai bani sidea pakon bani dewa ni sidea gabe ipaulak ma use poti ai hu tanoh Israel (1 Samuel 4-6). Ase patut do sonai hamegahon pakon malas ni uhur  ni halak Israel sanggah na inahkon poti ai bani  ianan na khusus i Jerusalem. Hona atap relevan do puji-pujian on age banta kuria ni Tuhan panorang on domu bani Minggu Jubilate, mar-olob-olob, marsurak-surak marmalas uhur. Tang onjolan ni malas ni uhur in ai ma parpuhoon ni Kristus humbani na matei na ipestahon hita piga-piga minggu na salpu, ai anggo lang puho Kristus humbani na matei soya ma haporsayaonta. Tapi hinorhon ni parpuhoonNi in gabe dong ma banta na porsaya pangarapan parpuhoon, halani Ia do parlobei ni sagala na dob modom in. Tongon, bani keadaanta sonari na mengalami buei hamaholon tarlobih hinorhon ni covid-19 nuan on,  baik selaku bangsa pakon pangisi ni dunia on, ra do  songon na marlawanan suruhan in hubagas uhurta, ai isuruh hita  mar-olob-olob, marsurak ibagas malas ni uhur. Tapi anggo pangkei ipardiatei hita ambilan on, patut do tongon hita marmalas ni uhur selaku na dob tinobus ni Naibata janah irik hujai ihorjahon hita homa aha na patut horjahononta.

2. Marhitei ambilan on, dong piga-piga pahara na sihol renunghononta, na patotap uhur, na gabe malas ni uhur, tapi dihut do homa pasal  sibahenonta, pasal tanggung-jawabta sadokah goluhta on. 

Parlobei. Parduli ope Naibata bani na tinompaNi. Anggo ipardiatei hita terjemahan hata Indonesia, bani ayat 31-33 jumpah hita do piga-piga hali hata ‘biarlah’ (Inggeris: let), na boi mararti : paturut ma, padihut ma, sihol ma.  Paturut ma marmalas ni uhur langit, anjaha marolob-olob tanoh on. Langit pakon tanoh na itompa Naibata bani mungkahni dear, bahkan ibagas keserasian pakon tinompa na legan iidah Naibata “domma dear tumang” (1 Musa 1:31), domma maseda ibahen jolma. Ai taratur ope langit sonai tanoh nuan on? Cuaca na lang manontu, hamilason na martambah-tambah, banjir na lang isangka-sangka, pakon na legan! Ibagas na sonai ai porlu idingat hita jolma, Naibata do na manjadihon na adong in, Ia do simadasi, Ia do Raja ni haganupan! Laut pakon ganup isini, ladang pakon ganup na iatasni, sonai pakon harangan sihol ma marolob-olob mamuji Naibata na manompasi. Tapi nuan, laut domma gabe sihabiaran, isini, ihan pakon binatang laut na legan in mandoruhi  halani pencermaran, ladang pakon harangan pe marsurak halani biar : bois ma hanami! Ibagas na sonin ma roh Naibata manguhum, patugahkon ija na lepak, janah mangajarhon sonaha na sintong sibahenonta, selaku jolma na iparentahkon Naibata laho manrajai, mengelola pakon merawat haganup jadi-jadianNi.

Paduahon. Puji ma Jahowa ai layak do Ia, ronsi sadokah ni dokahni do idop ni uhurNi. Seng ongga ipuji hita halak na mambahen na lang madear hubanta. Jadi, maningon iahapkon janah iparhatongon hita do pambahenan ni Naibata na madear banta ase tubuh uhur pamujion humbanta. Naibata totap ope layak, idop ni uhurNi lang marnarotap, iparmudu, isarihon, ibere banta haporluan pardagingon pakon partonduyon. Lang singgan parsatongkinan on, tapi dihut hagoluhan na manongtong. Anggo ibere ma AnakNi in bahen partobusta, na legan-legan in pe seng anjai lang bereonNi banta. Bani haganupan in patut do pujionta Ia.

Patoluhon. Urupi Ham ma hanami! Dilo-dilo pakon pangindoan na sonon ma ra sibahatan luar age humbagas uhur pakon pamangan ni hita na porsaya tarlobih ibagas panorang sonari. Tontu hal na patut do in, halani porsaya do hita bani kuasa ni Naibata na mangatasi haganup, janah homa ihaporsayai hita do paridop ni uhur do Tuhanta. Sihabiaranta nuan sedo kuasa atap panggomgomion ni bangsa na legan songon na idompakhon Israel bani panorangni, tapi naborit na mambahen hita sindunia on do marhamaholon bani  buei sisi ni pargoluhon. Sonai pe, itangihon Naibata do tonggo, dilo-diloonta

Marsurak, marolob-olob ma bani Tuhan, ipardulihon ope hita, iajari bani na patut, ipasingat bani na ulang. Iparditei, isarihon do hita anjaha itangihon sora dilo-dilonta. HataNi in do na mangajarhon in banta. Amen.