Halani itundalhon sidea do Jahowa, iuhum ma bangsa on marhitei na iondoskon/ijualhon hubani si Jabin, raja ni tanoh Kanaan, na puanglima balani margoran si Sisera (4:2) Gogoh tumang do raja on sonai puanglimani, pala do 20 tahun halak Israel iarsik. Bani panorang ai si Debora do na gabe nabi sonai age gabe panguhum (4:4). Doruh-doruh do halak Israel itangihon Jahowa do. Jadi ipakei ma Debora riap pakon si Barak mambobai bangsa on mangimbang raja Jabin, janah marhitei Jahowa ipatunduk ma si Jabin ilobei ni halak Israel (4:23). Ipatunduk Jahowa do ra Jabin, sanggah bangsa Israel lang parsimada bani gantar anjaha tanja. Janah teks ni ambilanta on ai ma doding ni Debora dob mangidah pambahenan ni Jahowa na paluahkon bangsa-Ni.

Hatoranganni

Dob iondoskon Jahowa si Sisera, puanglima ni si Jabin raja ni halak Kanaan ai hubani si Barak, mandoding do si Debora pakon si Barak mandodingkon pujian hubani Jahowa halani hamonangan ni sidea (ay.1). Debora mangakui sonaha porlu ni hajongjongan ni sahalak pambobai bani bangsa in, ase boi atur, banjei, torsa janah julur pargoluhan ni sada bangsa. Tapi agepe sonai, sonaha pe hajongjongan ni sipambobai, anggo seng dong do homa rayat ni, seng dong laba ni sipambobai ai. Sipambobai maningon sirsir mambobahon rayat ni janah rayat ni pe maningon sirsir homa mambere diri ni ibagas manghorjahon na sinuruh ni sipambobai ni. Ai do ase nini, ”halani rosuh uhur ni bangsa in manggalangkon diri ni” (ay 2). Aima ase marhasil janah monang bangsa Israel mandompakhon siah ratus gareta bosi si Sisera puanglima ni si Jabin raja ni halak Kanaan ai.

Hamonangan na binahen ni Jahowa paluahkon bangsa Israel, seng pitah sanggah mantaluhon si Sisera tumang. Halani ai do ase ihatahon, “Tangihon ma, nasiam raja-raja! Tarehon nasiam ma pinggol nasiam siparkuasa!” Debora sihol patugahkon pambahenan ni Jahowa na dob marulak-ulak pamonangkon sidea mangimbang bangsa na legan. Ase pambahenan ni Jahowa dompak bangsa in, talup do sidingaton seng halani na masa sanggah monang mandompakhon si Sisera tapi halani humbani nabasaia pe, totap do habujuron ampa holong ni Jahowa. (ay 3-5)

Ai sompat do longang janah lungun huta-huta ni halak Israel (ay 6), seng pitah pargoluhan ni bangsa Israel na borat janah sombuh tapi age sinjata ni sidea bois do haganup ibuat, gantar age tanja ni ompat puluh ribu halak Israel pe seng dong be. Artini, ipadorun humbani haganup bidang, situasi on ma mambahen bangsa in seng boi manlawan tentara ni si Sisera. Ai porini sihol mardalan pe hun huta na sada hu huta nalegan, maningon mardalan humbani dalan na maringgot, anggo lang sonai, matei ma.

Ibagas situasi na sonin borat ni, seng dong sipambobai, ipabangkit Jahowa do si Debora na gabe sipambobai bani Israel, mambobai usih songon sahalak inang. Gabe inang ni Israel do Debora, na ipakei Jahowa manramotkon, manjaga bangsa Israel. Sirsir do Debora ipakei Tuhan mamboai bangsa in mandompakhon situasi na borat in rap pakon bangsa in. (ay 7-9)

Ipaondos do hubani sipambobai ase mambaritahon pambahenan ni Jahowa na sonin jenges ni manghopkop bangsa in. Maningon sahapkonon janah baritahonon do hubani haganup halak das hu huta-huta pambahenan ni Jahowa. Maningon talar janah ibotoh haganup bangsa bahasa Jahowa do na pamonanghon bangsa in humbani si Sisera. Gabe barita malas ni uhur ma ai bani halak na tartaban.

Ai pangurupion ni Jahowa talar do marhitei morga-morga ni bangsa Israel na sirsir marporang rap pakon si Debora. Ase mandoding janah ipuji ma Jahowa halani haganup dear layak ni na dob pamonanghon bangsa Israel mangimbang halak Kanaan ai. (ay 10-12)

Hahonaonni

1. Ipatalar Jahowa do kuasa-Ni na marhagogohan ai laho paluahkon bangsa-Ni humbani munsuh janah ipatunduk Jahowa do na binahen ni halak na markuasa, gabe monang ma bangsa-Ni/hita, pataridahkon hadaulaton-Ni. Ai ma onjolan banta mardingat kuasa hagogohon ni Jahowa na paluahkon hita humbani bagei hamaholon, pergumulan bani iananta marhorja, i rumah tangga, kuria, ampa humbani dousanta.
2. Marhitei doding puji-pujian ai, iajarhon do hubanta, tolu pangajarion aima: Jahowa mangkaholongi bangsa napinilih-Ni; Keberanian ni jolma marhaporsayaon hubani Jahowa porini pe maningon ilopusi hamaholon janah sirsir martoruh ni uhur i lobei ni Jahowa, pakon: Dihut bani pandiloon ni Jahowa
3. Goran ni minggunta, Kantate: Dodingkon ma bani Jahowa, doding na baru (Psalm 98:1). Ipaondos hita ma doding na baru (doding hatarimakasihononta) bani Jahowa, dalanta laho manaksihon goran-Ni na pansing in. Itangihon Jahowa do dilo-dilonta, songon Jesus na dilo-dilo bani hayu parsilang in mandilohon hubani Jahowa, Ham Bapa hubagas tangan-Mu ma huondoskon tonduy-Hu ( Luk 23:46).