Usih sonaima na ialami Petrus bani kuria mula-mula, ija halak na dob marsunat pakon na so marsunat pantang do mardomu iluar kelompokni bei. Petrus ianggap domma salah halani mangidangi itongah-tongahni halak naso marsunat ope.

Adong tolu hali Petrus mengalami pangungkabon humbani Naibata sanggah i Joppe pasal nabutak pakon na pansing na lang adongbe (5-10). Sonai do homa ipataridahkon Naibata do homa dirini hubani si Kornelius pasal Petrus na laho roh mamboban barita haluahon hubani pakon haganup pangisini rumahni (ay 13,14). Janah ipatugah Petrus do pasal sonaha Tonduy Napansing sogop hubani sidea haganup pangisini rumah ai (ay 15,16), sehingga akhirni boido iarusi sidea pasal horjani Naibata hubani haganup bangsa ampa ipasangap sidea ma goranni Tuhan (ay 17,18).

Hatoranganni

Petrus bani ambinan on patorangkon sura-sura ni Naibata laho mandilo bangsa na legan songon Naibata na dob mandilo Israel. Ipatugah do use panonggoranni ampa panonggoran na nididah ni si Kornelius (bindu 10). Adong do na piga-piga hal na unik tumang pasal panonggoran ni sidea na dua on, aima:

Parlobei, Petrus mangidah binatang na butak bani pangidahni, sedangkan si Kornelius mangidah sada malekat ni Naibata.

Panonggoran ni si Petrus mangajarisi ase ulang ianggap butak aha pe na lang ianggap Naibata butak. Hape panonggoran ni si Kornelius mangajarhon bahasa ia iharosuhkon Naibata janah lang ianggap butak. Panonggoran on lang pitah laho mangajari si Petrus, tapi dihut mangajari halak Jahudi na legan na dob gabe susian ni Jesus. Porlu do homa ibotoh sidea Naibata lang marosuh anggo ihatahon halak na legan butak.

Paduahon, Naibata do na mambahen haganup, janah marbalos pitah hubani Naibata do ia.

Naibata do na pasirsirhon si Kornelius laho manangar Ambilan Namadear. Naibata do homa marsuruh si Petrus roh hu rumah ni si Kornelius mangambilankon Ambilan Namadear ijai. Naibata do homa na mambuka pinggol ni si Kornelius ampa pangisi rumahni ase porsaya sidea bani barita ni si Petrus. Naibata do homa na mamberehon Tonduy Napansing bani si Kornelius ampa haganup na manangar barita Ambilan Namadear humbani si Petrus. Anggo domma ididi Kristus si Kornelius marhitei Tonduy Napansing, sonaha ma boi ilarang si Petrus si Kornelius ididi marhitei bah?

Patoluhon, iondolhon Petrus ai ma sibere-bere na sarupa na dob ijalo susian ai sonari marlobih-lobih do ibere hubani si Kornelius.

Susian martonggo, sabar paimahon i rumah ai, gok biar ampa gobir ronsi ujungni manjalo sibere-bere ni Tonduy Napansing (Lah 1:14; 2:1-4). Kornelius ai ma sahalak na ringgas paimahon Naibata janah martonggo hubani Naibata (Lah 10:2) ronsi ujungni manjalo sibere-bere Tonduy Napansing bani. Sibere-bere on ai ma sibere-bere ni laho mambaritahon Kristus ampa pasangapkon goran-Ni. On ma sibere-bere na ijalo susian i Jerusalem sonai homa na ijalo si Kornelius i Kesarea, lang be ibahen Naibata parleganan. Anggo sebelumni Israel memiliki keunggulan marimbang bangsa-bangsa na legan, sonari Israel dos do pakon bangsa-bangsa na legan. Anggo sapari halak na sihol marsombah hubani Naibata ningon roh hu Israel, mangirikkon tradisi Israel ampa maribadah ibagas cara na ipajongjong Naibata marhitei Israel, sonari baik halak Israel age bangsa na legan na sihol marsombah hubani Naibata ningon marsombah hu-Bani ibagas Kristus.

Hatorangan ni si Petrus ai mambahen halak Jahudi na mangirikkon Jesus marhamubahon ni uhur. Sonari martarimakasih ma sidea bani Naibata janah lang be iparsoalhon sidea pasal bangsa ni si Kornelius. Sonari sidea pasangapkon Naibata dob iarusi sidea lumbang ni uhur ni Naibata. On ma parleganan ni halak na sompit pingkiran pakon halak na lumbang uhurni. Jolma na marlumbang ni uhur, sirsir do ikoreksi bahkan pasangapkon Naibata halani pangarusion na baru na dapotsi. Martarima kasih tumang do sidea bani Naibata halani holong do homa uhur ni Naibata bani bangsa na legan.

Hahonaonni

1.                  Sai ibere Naibata ma hubanta uhur na lumbang homa laho manjalo kelompok na legan na dob iharosuhkon Naibata. Ibagas kuria ni Naibata lang dong be perbedaan suku. Na mambahen perbedaan ai ma kesetiaan hubani Naibata janah sirsir mambalosi Naibata. Anggo adong na setia bani Naibata, marsijoloman bani Kristus, masihol bani Naibata, sihol mangidangi, janah pasangapkon goran-Ni, halak ai ma saninanta ibagas Kristus. Anggo adong na lang mampardiateihon Naibata, mangapasi goran-Ni, mangapasi Kristus, ampa manrisai hata-Ni, na legan ma halak ai banta pori pe saninanta sandiri do ia marhitei daroh. “Barang ise na mangkorjahon harosuh ni Bapa na i nagori atas, ai do inang-Ku anjaha ai do angging-Ku” nini Tuhan Jesus (Mat. 12:50). Barang ise na hinarosuhkon ni Naibata, ai ma saninanta.

2.                  Ulang be manggoluh ibagas pandangan na sompit pasal parlumbaan. Naibata lang mambedahon jolma berdasarkan warna kulit, celaka ma jolma na totap mambedahon berdasarkan warna kulit. Lang ipaturut Naibata be adong tembok pemisah antara bangsa ni Naibata pakon bangsa-bangsa sipajuh begu-begu. Ulang mambeda-bedahon halak marhitei cara na lang iharosuhkon Naibata.