MARTUAH MA HALAK PARPINTOR

Sibasaon 29 Oktober 2017

Baca Teks : Psalmen 1 : 1 – 6

1. Ambilan on aima hasaksian ni par-psalmen pasal panandaionni bani Naibata. Hasaksian on lang sekedar ungkapan kata tapi kesaksian atau ungkapan iman. Marhitei pengalaman hidup, ibotoh ma bahwa Naibata marosuh do hubani halak parpintor tapi ihagigihon do parjahat. Halani ai tubuh do prinsip bani par-psalmen bahwa jolma na martuah sedo manurut ukuran na gati iarusi jolma (habayakon, hagabeion, hasangapon) tapi sidea na lang ra mangihutkon riah ni parjahat do (ay.1). Halani ai do hatuahon, maka prioritas utama bani goluhni par-psalmen aima mardalan bani hapintoron ampa hata ni Naibata do. Malasan do uhurni mardalan bani hata ni Naibata marimbang atap aha pe na adong i dunia on. Ukuran na sintong bani lang be dirini atau pingkiranni, lang be rosuh ni dunia on tapi domma hata ni Naibata (ay.2). Halani ai lang mabiar ia age ihagigihon parjahat bahkan menanggung segala resiko halani mardalan ia bani hata ni Naibata. Prinsip na sonon tubuh halani ihaporsayai bahwa saguru bani Naibata do haganup goluh ni jolma janah ihaporsayai bahwa Naibata do na manramotkon goluh ni parpintor tapi iimbang Naibata do anggo halak parjahat (ay.3-4).

2. Ipausih do halak parpintor songon hayu na sinuan i topi ni bah mardalan. Pori pe aha na masa bahkan terjadi musim kemarau / kering, tapi totap do ratah bulungni bahkan boi marbuah bani musimni. Sonin ma parpintor in totap margogoh janah boi marmalas ni uhur bani ganup perobahan atau na masa halani Naibata do na manjaga ampa paluahkon sidea. Sebalikni parjahat ipausih do hubani lapa-lapa na hinabangkon ni logou. Maksuni: lang berdaya, urah habang atau maseda, lang margogoh paluahkon dirini ; Usih songon logou na lang taridah tapi boi pahabangkon lapa-lapa, sonin ma parjahat gati songgotan halani ibagas na lang panagaman ni sidea hape domma roh logou pangagou parsedahon goluh ni sidea. Hatahonon, sisoya-soya do rupei ni halak parjahat tapi malas ni uhur do anggo ulih ni parpintor. Domu hujin ma par-psalmen mambahen keputusan bani goluhni, anggo ia totap do mamilih dalan ni Naibata. Bahkan ia totap do mamingkir-mingkiri hata atau titah ai arian pakon borngin (ay.2b). Tujuanni ase ulang terlena ia gabe manundalhon Naibata pangkorhon ni na masa atau pengaruh dunia na sihol parsedahon goluhni. Hata ni Naibata bani parpsalmen aima pengendali hidup ase boi terluput humbani ganup logou ni dunia na sihol parsedahon goluhni. Sadar do ia bani keterbatasanni, halani ai gabe ihaporluhon do tongtong mambohali dirini bani hata ni Naibata ase jumpahsi gogoh.

3. Selanjutni isobut: parjahat seng tahan i lobei ni paruhuman ni Naibata tapi itanda Jahowa do dalan ni halak parpintor (ay.5-6). Sihol mangkatahon bahwa haganup jolma (parpintor age parjahat) ningon do mampartanggung-jawabkon horjani bei i lobei ni Naibata. Pori pe idahon songon na mardohar goluh ni parjahat tapi sasintongni domma manuju hu hamagouan sidea, sebalikni pori pe idahon songon na loja bahkan maruntol parpintor tapi sasintongni domma parrupei sidea bani idop ni uhur ni Naibata. Pangarapan na sonin ma mambahen mampu parpintor in marhasabaron bahkan marmalas ni uhur pori pe sipata ihagigihon dunia on sidea halani horja hapintoron ai. halani ai ukuran na madear atau malas ni uhur bani lang be sekedar perkara-perkara dunia tapi anggo mardalan ia bani hata ni Naibata do. Na lang do haganup na i dunia on anggo sirang do goluhni humbani hata ni Naibata 

4. Refleksi

a. Totap do iperhadapkon goluhta hubani dua pilihan aima rosuh ni dunia atau rosuh ni Naibata. Anggo lang pakkei, boi do seolah-olah idahon rosuh ni dunia on lebih menarik daripada rosuh ni Naibata. Sonin ma sibolis selalu memperdaya hita ase ipilih hita rosuh ni dunia on. Halani ai mutlak ibangun hita kematangan rohani ase pilihanta totap mardalan bani hata ni Naibata.

b. Anggo i dunia on buei do ukuran ni na martuah, tapi banta selaku na porsaya, hatuahon, malas ni uhur ampa hauntungan aima anggo manggoluh janah mardalan hita ibagas hapintoron na domu bani hata ni Naibata do.

c. Domu hujin ukuran ni na sintong lang be aha nini dunia on, aha nini lingkungan atau aha na sosok bani pingkiranta tumang tapi aha na sadalan bani hata ni Naibata ma. Anggo on prinsipta, pasti malas do uhurta pori pe ihagigihon dunia on hita halani mangkorjahon hapintoron.

d. Haleluya No. 459 : 1,4